இறுதிச்சுற்றுக்கு முன்னேறியது சென்னை!

ஐபிஎல் 2023 தொடரில் குஜராத் அணியை வீழ்த்தி சென்னை சூப்பர் கிங்ஸ் அணி இறுதிச்சுற்றுக்கு முன்னேறியுள்ளது. ஐபிஎல் கிரிக்கெட் தொடரில் இன்று முதலாவது தகுதிச்சுற்று ஆட்டம் சென்னை சேப்பாக்கம் மைதானத்தில் நடைபெற்றது.

இதில் சென்னை சூப்பர் கிங்ஸ், குஜராத் டைட்டன்ஸ் அணிகள் மோதின.

நாணயச் சுழற்சியில் வென்ற குஜராத் அணி பந்துவீச்சை தேர்வு செய்ய, சென்னை அணி முதலில் பேட்டிங் செய்தது.

துவக்க வீரர் ருதுராஜ் கெய்க்வாட் அதிரடியாக விளையாடி ஓட்டங்கள் குவித்தார்.

36 பந்துகளில் அரை சதம் கடந்த அவர் 60 ஓட்டங்களில் ஆட்டமிழந்தார். அவரைத் தொடர்ந்து களமிறங்கிய ஷிவம் துபே ஒரு ஓட்டத்துடன் வெளியேறினார்.
ரகானே 17 ஓட்டங்களுடன் ஆட்டமிழந்தார். மறுமுனையில் சிறப்பாக ஆடிக்கொண்டிருந்த தேவன் கான்வே, 40 ஓட்டங்களில் விக்கெட்டை இழந்தார். அப்போது அணியின் ஓட்ட எண்ணிக்கை 125 ஆக இருந்தது.

ரகானே, அம்பதி ராயுடு தலா 17 ரன்கள் மட்டுமே சேர்த்தனர். 19வது பந்துப் பரிமாற்றத்தில் ஜடேஜாவுடன் இணைந்த அணித் தலைவர் மகேந்திர சிங் டோனி 2 ஓட்டங்களுடன் ஆட்டமிழந்து ஏமாற்றம் அளித்தார்.

அதன்பின் ஜடேஜா 22 ஓட்டங்கள், மொயீன் அலி ஆட்டமிழக்காது 9 ஓட்டங்கள் சேர்க்க, சென்னை அணி 20 பந்துப் பரிமாற்ற முடிவில் 7 விக்கெட் இழப்பிற்கு 172 ஓட்டங்கள் சேர்த்தது.

குஜராத் அணி தரப்பில் மோகித் சர்மா, ஷமி தலா 2 விக்கெட்டுகள் கைப்பற்றினர்.

தர்ஷன், ரஷித் கான், நூர் அகமது தலா ஒரு விக்கெட் எடுத்தனர். இதையடுத்து 173 ஓட்டங்கள் எடுத்தால் வெற்றி என்ற இலக்குடன் குஜராத் டைட்டன்ஸ் அணி களமிறங்கியது.

இதில், சுப்மன் கில் அதிகபட்மாக 42 ஓட்டங்களை எடுத்தார். தொடர்ந்து, ஷனக்கா 17 ஒட்டங்களும், சாஹா 12 ஓட்டங்களும், விஜய் சங்கர் 14 ஓட்டங்களும், ஹர்திக் பாண்டியா 8 ஓட்டங்களும், டேவிட் மில்லர் 4 ஓட்டங்களும், ராகுல் திவாடியா 3 ஓட்டங்களும் எடுத்தனர்.

ரஷித் கான் 30 ரஓட்டங்களுடன் ஆட்டமிழந்தார்.

நூர் அகமது 7 ஓட்டங்கள் எடுத்து ஆட்டமிழக்காமல் இருந்தார். 19வது ஓவரில் 9 விக்கெட்டுகளுடன் குஜராத் அணி 146 ஓட்டங்களை எடுத்திருந்தது.
இன்னும் 6 பந்துகளில் 27 ரன்கள் எடுத்தால் வெற்றி என்ற இலக்குடன் குஜராத் அணி விளையாடியது.

இந்நிலையில், ஆட்டத்தின் முடிவில் 20 பந்துப் பரிமாற்ற முடிவில் அனைத்து விக்கெட் இழப்பிற்கு 157 ஓட்டங்கள் எடுத்து குஜராத் அணி தோல்வியடைந்தது.
இதன் மூலம், முதன்முறையாக குஜராத் அணியை வீழ்த்தி சென்னை சூப்பர் கிங்ஸ் அணி இறுதிச்சுற்றுக்கு முன்னேறியுள்ளது.