2023 ஆம் ஆண்டு மாத்தறை வெலிகம பகுதியில் உள்ள ஹோட்டல் ஒன்றுக்கு அருகில் நடந்த துப்பாக்கிச் சூட்டு சம்பவம் தொடர்பாக வாக்குமூலம் பதிவு செய்ய முன்னாள் பொது மக்கள் பாதுகாப்பு அமைச்சர் டிரான் அலஸுக்கு குற்றப்புலனாய்வுத் திணைக்களம் அழைப்பாணை விடுத்துள்ளது.
வாக்குமூலம் பதிவு செய்வதற்காக நாளை திங்கட்கிழமை (31) ஆஜராகுமாறு முன்னாள் அமைச்சருக்கு அழைப்பாணை விடுத்துள்ளதாக குற்றப்புலனாய்வுத் திணைக்களத்தின் மூத்த அதிகாரி ஒருவர் தெரிவித்துள்ளார்.
வெலிகம துப்பாக்கிச் சூட்டு சம்பவத்துடன் தொடர்பான விவரங்கள் முன்னாள் அமைச்சருக்குத் தெரிந்திருக்கலாம் என்ற அடிப்படையில் வாக்குமூலம் பதிவு செய்யப்படவுள்ளதாக அவர் மேலும் தெரிவித்துள்ளார்.
மேலும், இந்த சம்பவம் தொடர்பாக முன்னாள் பொலிஸ் மா அதிபர் தேசபந்து தென்னகோன் விளக்கமறியலில் வைக்கப்பட்டுள்ளார்.
2023 ஆம் ஆண்டு டிசம்பர் மாதம் மாத்தறை வெலிகம, வெலிகம பெலேன பகுதியில் ஹோட்டல் ஒன்றுக்கு அருகில் நடந்த துப்பாக்கிச் சூட்டு சம்பவத்தின் போது கொழும்பு குற்றத்தடுப்பு பிரிவு பொலிஸ் சார்ஜன் உயிரிழந்துள்ளார்.
இந்த சம்பவம் தொடர்பாக முன்னாள் பொலிஸ் மா அதிபர் தேசபந்து தென்னகோன் உட்பட எட்டு பொலிஸ் அதிகாரிகளை கைது செய்ய மாத்தறை நீதவான் நீதிமன்றம் அண்மையில் உத்தரவிட்டிருந்தமை குறிப்பிடத்தக்கது.
