நாட்டு மக்களின் அமோக வாக்குகளாலேயே நான் ஜனாதிபதியாக தெரிவு செய்யப்பட்டேன். சிலரின் கோமாளித்தனமான செயல்பாடுகளால்தான் ஜனாதிபதி பதவியில் இருந்து நானாகவே விலகியிருந்தேன். மக்களின் ஆதரவு இன்னமும் எனக்கு இருக்கின்றது – இவ்வாறு முன்னாள் ஜனாதிபதி கோட்டாபய ராஜபக்ஷ தெரிவித்துள்ளார்.
அத்துடன், ‘ஓய்வு நிலையில் இருக்கும் நான் மீண்டும் அரசியலுக்கு வருவது தொடர்பில் இன்னமும் தீர்மானிக்கவில்லை.’ – என்றும் அவர் கூறியுள்ளார்.
சமகால அரசியல் நிலைவரம் தொடர் பில் கருத்துரைக்கும்போதே அவர் மேற்கண்டவாறு கூறினார். மேலும்,
இந்த ஆண்டு ஜனாதிபதி தேர்தலுக் கான ஆண்டு. அதனால் புதிய கூட்டணிகள் தொடர்பான அறிவிப்புகள் வந்து கொண்டிருக்கின்றன. அந்தக் கூட்டணிகள் தொடர்பில் சிலர் என்னுடனும் பேசியுள்ளனர். எனினும், எந்தக் கூட்டணியுடனும் இணைவது தொடர்பில் நான் முடிவு எடுக்கவில்லை.
நாட்டின் சமகால அரசியல் நிலவரத்தை நான் உன்னிப்பாக அவதானித்து வருகின்றேன். பலத்த சவாலுக்கு மத்தியில் நாட்டின் முன்னேற்றத்துக்காக ஜனாதிபதி ரணில் விக்கிரமசிங்க அயராது பாடுபடுகின்றார். இந்த வருடம் ஜனாதிபதி தேர்தல் நடைபெற்றே தீர வேண்டும்.
அதை ஒத்திவைக்கும் எண்ணம் எவருக்கும் இருக்கக்கூடாது. – என்றார்.
