யாழ்ப்பாணம் – காரைநகர் கடற்பரப்பிற்குள் எல்லை தாண்டி மீன்பிடித்த குற்றச்சாட்டில் இலங்கைக் கடற்படையினரால் கைது செய்யப்பட்ட இந்திய மீனவர்கள் 12 பேர் நேற்று வெள்ளிக்கிழமை நிபந்தனைகளுடன் விடுவிக்கப்பட்டுள்ளனர்.
ஊர்காவற்றுரை நீதிவான் நீதிமன்றின் முன்னிலைப்படுத்தப்பட்ட இந்திய மீனவர்கள் 12 பேருக்கு எதிராக முன்வைக்கப்பட்ட மூன்று குற்றச்சாட்டுகளுக்கும், தலா ஆறு மாதங்கள் சிறைத்தண்டனை என்ற ரீதியில், ஐந்து வருடங்களுக்கு ஒத்திவைக்கப்பட்ட 18 மாதங்கள் சிறைத்தண்டனை விதித்து நீதவான் உத்தரவிட்டார்.
காரைநகர் கடற்பரப்பில் 3 மீன்பிடி படகுகளுடன் மீனவர்களும் 12 இந்திய மீனவர்களும் கடந்த 13 ஆம் திகதி கைது செய்யப்பட்டிருந்தனர்.
அவர்கள் பயணித்த படகின் உரிமையாளர் படகில் பயணித்தமையால், படகை பறிமுதல் செய்ய நீதிவான் உத்தரவு பிறப்பித்துள்ளதுடன் ஏனைய இரண்டு படகுகளின் உரிமையாளர்களும் படகில் இருக்காத காரணத்தால், அவர்களை முதலாவது சந்தேகநபராகக் கருதி வெளிவிவகார அமைச்சினூடாக அவர்களுக்கு அழைப்பாணை அனுப்புமாறு நீதவான் உத்தரவிட்டுள்ளார்.
இந்த இரண்டு மீன்பிடி படகுகள் தொடர்பான உரிமை கோரல் வழக்கு மார்ச் மாதம் 11 ஆம் திகதி விசாரணைக்கு எடுத்துக்கொள்ளப்படுமெனவும் நீதவான் அறிவித்துள்ளமை குறிப்பிடத்தக்கது .
