வவுனியாவில் ஏ – 9 வீதியில் அமைந்துள்ள அரசாங்க விதை உற்பத்திப் பண்ணைக்கு அண்மித்த பகுதியில் இன்று இடம்பெற்ற வாகன விபத்தில் இளைஞர் ஒருவர் உயிரிழந்துள்ளார்.
இன்று (05) அதிகாலை இடம்பெற்ற விபத்து சம்பவம் தொடர்பில் மேலும் தெரியவருகையில்,
வவுனியா நகரிலிருந்து யாழ்ப்பாணம் நோக்கிப் பயணித்துக் கொண்டிருந்த கனரக வாகனத்தை ஏ – 9 வீதியில் அமைந்துள்ள அரசாங்க விதை உற்பத்திப் பண்ணைக்கு அண்மித்த பகுதியில் அதே பாதையில் பயணித்த மோட்டார் சைக்கிள் கனரக வாகனத்தை முந்திச் செல்ல முற்பட்ட சமயத்தில் எதிர்த் திசையில் வவுனியா நோக்கிப் பயணித்துக் கொண்டிருந்த ஹயஸ் ரக வாகனத்துடன் மோதுண்டு மோட்டார் சைக்கிள் விபத்துக்குள்ளானது.
600 மீற்றர் தூரம் வரையில் மோட்டார் சைக்கிள் தரையில் இழுத்துச் செல்லப்பட்டுள்ளது என்று பொலிஸாரின் ஆரம்ப கட்ட விசாரணைகளிலிருந்து தெரியவந்துள்ளது.
இந்த விபத்தில் மோட்டார் சைக்கிளின் சாரதியான வவுனியா, குருமன்காடு பகுதியைச் சேர்ந்த 24 வயதுடைய சிவகுமார் ருபீன்ஸ்ராஜ் என்ற இளைஞர் உயிரிழந்துள்ளார்.
சடலம் பிரேத பரிசோதனைகளுக்காக வவுனியா மாவட்ட பொது வைத்தியசாலையில் வைக்கப்பட்டுள்ளது.
விபத்துடன் தொடர்புடைய மூன்று வாகனங்களும் வவுனியா பொலிஸ் நிலையத்துக்கு எடுத்துச் செல்லப்பட்டன.
விபத்து தொடர்பான மேலதிக விசாரணைகளை வவுனியா பொலிஸார் முன்னெடுத்து வருகின்றனர்.
