பொதுத் தேர்தலில் ஒவ்வொரு மாவட்டங்களிலும் போட்டியிடும் அரசியல் கட்சிகள் மற்றும் சுயேச்சைக் குழுக்களின் எண்ணிக்கை அதிகரித்துள்ளதால் மூன்று மாவட்டங்களைத் தவிர, ஏனைய சகல மாவட்டங்களிலும் உள்ள சகல தேர்தல் தொகுதிகளிலும் வாக்குச் சீட்டுகளை இரண்டு நெடுவரிசைகளாக அச்சிட தேர்தல் ஆணைக்குழு தீர்மானித்துள்ளது.
அதற்கமைய, வாக்குச் சீட்டுகளின் கீழ்ப் பகுதியில் போட்டியிடும் அரசியல் கட்சிகளின் வேட்பாளர்களின் எண்ணிக்கையுடன் பொருந்தும் வகையில் இலக்கம் குறிப்பிடப்பட்டிருக்குமென்று தேர்தல் ஆணையாளர் நாயகம் சமன் ஸ்ரீ ரத்நாயக்க தெரிவித்தார்.
கொழும்பில் நேற்று (04) இடம்பெற்ற செய்தியாளர் சந்திப்பில் அவர் தொடர்ந்து கருத்துத் தெரிவிக்கையில்,
‘‘பொதுத் தேர்தல் தொடர்பில் உயர்நீதிமன்றத்தில் தாக்கல் செய்யப்பட்டிருந்த அடிப்படை உரிமை மீறல் மனு குறித்து நீதிமன்ற தீர்ப்பு வழங்கப்பட்டுள்ளது. அதற்கமைய, அடிப்படை உரிமை மீறல் மனுவை நிராகரித்து மனு நீக்கப்பட்டுள்ளது. எனவே, தேர்தலுக்கான நடவடிக்கைகள் தொடர்பில் எந்த சிக்கலும் இல்லை.
எதிர்வரும் 14ஆம் திகதி பொதுத் தேர்தலை நடத்துவதற்கு அவசியமாக சகல பணிகளும் முன்னெடுக்கப்பட்டுள்ளன. பொதுத் தேர்தலுக்கான வர்த்தமானி ஜனாதிபதியின் செயலாளரினாலேயே வெளியிடப்பட்டிருந்தது. அந்த வர்த்தமானிக்கமையவே இந்த அடிப்படை உரிமை மீறல் மனு தாக்கல் செய்யப்பட்டிருந்தது.
எனவே, இன்றிலிருந்து (நேற்றிலிருந்து) பொதுத் தேர்தலை நடத்துவதற்கு இன்னும் பத்து நாட்களே எஞ்சியிருக்கின்றன. எனவே, தேர்தலுக்கு அவசியமான சகல பணிகளும் நிறைவு செய்யப்பட்டுள்ளன. அதேபோன்று, எதிர்வரும் நாட்களுக்கான பணிகளும் வெற்றிகரமாக இடம்பெற்று வருகின்றன.
எதிர்வரும் 14ஆம் திகதி ஒரு கோடியே 71 இலட்சத்து 40 ஆயிரத்து 354 வாக்காளர்களால் அவர்களுக்குரிய வாக்களிப்பு நிலையங்களில் அவர்களின் வாக்குகளை பதிவு செய்யக் கூடியதாக இருக்கும். வழக்கு செயற்பாடுகளின் மத்தியிலும் தேர்தலுக்கான சகல பணிகளையும் நாங்கள் முன்னெடுத்திருந்தோம்.
ஒருவேளை நீதிமன்ற தீர்ப்புகளுக்கமைய தேர்தல் செயற்பாடுகளை இடைநிறுத்த வேண்டி ஏற்பட்டிருக்கும். இதற்கு அப்பால் தேர்தலை நடத்துவதற்கு சட்ட சிக்கல் எதுவும் இல்லை. உரிய தினத்தில் தேர்தல் நிச்சயமாக இடம்பெறும்.
தபால் மூல வாக்களிப்பு நடவடிக்கைகள் கடந்த 30, 01, 04ஆம் திகதிகளில் இடம்பெற்றிருந்தன. இந்த மூன்று தினங்களில் வாக்களிக்க தவறியிருந்தால் எதிர்வரும் 07 மற்றும் 08 ஆம் திகதிகளில் வாக்களிக்க முடியும். உத்தியோகபூர்வ வாக்காளர் அட்டைகளை விநியோகிக்கும் பணிகளும் இடம்பெற்று வருகின்றன.
இதேவேளை, இம்முறை ஒவ்வொரு மாவட்டங்களிலும் போட்டியிடும் அரசியல் கட்சிகள் மற்றும் சுயேச்சைக் குழுக்களின் எண்ணிக்கை அதிகரித்துள்ளதால், வாக்குச் சீட்டை ஒரு நெடுவரிசையாக அச்சிட முடியாது. அதற்கமைய, மூன்று மாவட்டங்களை தவிர ஏனைய சகல மாவட்டங்களிலுமுள்ள சகல தேர்தல் தொகுதிகளிலும் வாக்குச் சீட்டுகளை இரண்டு நெடுவரிசைகளாக அச்சிட தேர்தல் ஆணைக்குழு தீர்மானித்துள்ளது. அதற்கமைய வாக்குச் சீட்டுகளின் கீழ் பகுதியில், போட்டியிடும் அரசியல் கட்சிகளின் வேட்பாளர்களின் எண்ணிக்கையுடன் பொருந்தும் வகையில் இலக்கம் குறிப்பிடப்பட்டிருக்கும்.
எனவே, வாக்களிக்கும்போது விருப்பமான அரசியல் கட்சி அல்லது சுயாதீன குழுவுக்கு முன்னால் புள்ளிக்கோடிட முடியும். அதற்கு கீழுள்ள இலக்கங்களின் மீது விருப்பு வாக்குகளை வழங்க முடியும். ஒரு வேட்பாளருக்கு ஒரு விருப்பு வாக்கை மாத்திரமே வழங்க முடியும். அதேபோன்று, வாக்களிப்புக்கு அவசியமான விடுமுறைகளை வழங்க நிறுவனங்கள் நடவடிக்கை எடுக்கவேண்டும். அதுதொடர்பில் முறைப்பாடு கிடைக்குமாக இருந்தால் சட்ட நடவடிக்கை எடுக்க நேரிடும்’’ என்றார்.
