திருகோணமலை மாவட்டம் ஈச்சிலம்பற்று பொலிஸ் பிரிவுக்குட்பட்ட பகுதியில் ஆணொருவரின் சடலமொன்று இன்று காலை மீட்கப்பட்டுள்ளதாக பொலிஸார் தெரிவித்தனர்.
உயிரிழந்தவர் ஈச்சிலம்பற்று முத்துச்சேனை பகுதியைச் சேர்ந்த இரண்டு பிள்ளைகளின் தந்தையான கே.சதீஸ் (வயது 35) எனவும் தெரியவருகிறது.
இச்சம்பவம் குறித்து தெரிய வருவதாவது,
நேற்று ஞாயிற்றுக்கிழமை இரவு மூன்று பேர் சேர்ந்து மதுபானம் அருந்தியுள்ளனர். மற்றைய இருவரும் வீடுகளுக்கு சென்றுவிட, குறித்த நபர் மது அருந்திய இடத்தில் சடலமாக மீட்கப்பட்டதாக கூறப்படுகிறது.
உயிரிழந்தவரின் வலது காதில் இரத்தம் கசிந்து காணப்பட்டதாகவும், சம்பவ இடத்துக்கு சென்று சடலத்தை பார்வையிட்ட மூதூர் நீதிமன்ற பதில் நீதவான் எம்.ஏ.சீ.மஹ்ரூப் சடலத்தை பிரேத பரிசோதனைக்காக திருகோணமலை பொது வைத்தியசாலைக்கு கொண்டு செல்லுமாறும் பொலிஸாருக்கு கட்டளையிட்டார்.
இந்த மரணம் தொடர்பில் குறித்த நபருடன் மது அருந்தியவர்களை விசாரணை செய்து வருவதாக ஈச்சிலம்பற்று பொலிஸார் தெரிவித்தனர்.
